ധുരന്ദറിൻ്റെ മഹാവിജയം, ഡോൺ 3 യിൽ നിന്ന് പിന്മാറി രൺവീർ, 40 കോടി നഷ്ടപരിഹാരം ആവശ്യപ്പെട്ട് നിർമാതാക്കൾ

ഫർഹാൻ അക്തർ സംവിധാനം ചെയ്ത് 2006ൽ പുറത്തിറങ്ങിയ ചിത്രമാണ് ഡോൺ. സിനിമയുടെ മൂന്നാം ഭാഗം കഴിഞ്ഞ വർഷം പ്രഖ്യാപിച്ചിരുന്നു. രൺവീർ സിങ് ആണ് ചിത്രത്തിൽ നായകനായെത്തുന്നത്. എന്നാൽ ധുരന്ദറിൻ്റെ വൻ വിജയത്തിന് പിന്നാലെ ഡോൺ ത്രീയിൽ നിന്ന് രൺവീർ പിന്മാറിയെന്ന് റിപ്പോർട്ടുകൾ വന്നിരുന്നു. ഇപ്പോഴിതാ നടനെതിരെ നഷ്ടപരിഹാരം ആവശ്യപ്പെട്ട് രംഗത്തെത്തിയിരിക്കുകയാണ് ഫർഹാൻ അക്തറിന്റെ എക്‌സൽ എന്റർടെയ്‌മെന്റ്.

40 കോടി രൂപയാണ് നഷ്ടപരിഹരമായി ഫർഹാൻ അക്തർ ആവശ്യപ്പെട്ടിരിക്കുന്നത്. ചിത്രത്തിൽനിന്ന് രൺവീർ പിന്മാറിയതോടെ വലിയ സാമ്പത്തിക നഷ്ടമുണ്ടായതായി നിർമാണ കമ്പനി ചൂണ്ടിക്കാണിക്കുന്നു. ഷെഡ്യൂളിങ്, ആസൂത്രണം, മറ്റ് കാര്യങ്ങളുമായി ബന്ധപ്പെട്ട കാലതാമസം എന്നിവയ്ക്കുള്ള നഷ്ടപരിഹാരമാണ് ആവശ്യപ്പെട്ടിരിക്കുന്നത്. തിരക്കഥയിൽ തൃപ്തനല്ലാത്തതിനാലാണ് പ്രൊജക്ടിൽ നിന്ന് പിന്മാറിയതെന്ന് രൺവീർ നേരത്തെ വ്യക്തമാക്കിയിരുന്നു. എന്നാൽ രൺവീർ പലതവണ മാറ്റങ്ങൾ ആവശ്യപ്പെപ്പെടുകയും ഫൈനൽ ഡ്രാഫ്റ്റിൽ അതൃപ്തി പ്രകടിപ്പിക്കുകയുമായിരുന്നുവെന്നും റിപ്പോർട്ടുണ്ട്. രൺവീറിന്റെ സമ്മതത്തോടെ ആണ് പ്രീ പ്രൊഡക്ഷനുമായി മുന്നോട്ടു പോയതെന്നും നിർമാണ കമ്പനി വ്യക്തമാക്കുന്നു.

രൺവീർ സിങ്ങും എക്‌സൽ എന്റർടെയ്ൻമെന്റും തമ്മിൽ രണ്ടു മണിക്കൂർ നീണ്ട കൂടിക്കാഴ്ച്ച നടത്തിയെന്നും എന്നാൽ യാതൊരു തീരുമാനമായില്ലെന്നും റിപ്പോർട്ടിൽ പറയുന്നു. തർക്കം രൂക്ഷമായ സാഹചര്യത്തിൽ ഇന്ത്യൻ പ്രൊഡ്യൂസേഴ്‌സ് ഗിൽഡ് പ്രശ്‌നപരിഹാരത്തിനായി ഇടപെട്ടിട്ടുണ്ട്. രൺവീർ സിങ്ങോ എക്‌സൽ എന്റർടെയ്ൻമെന്റോ വിഷയത്തിൽ ഔദ്യോഗിക പ്രസ്താവന നടത്തിയിട്ടില്ല. ധുരന്ദറിൻ്റെ വമ്പൻ വിജയത്തോടെ ഇനി ആക്ഷൻ-ഗ്യാങ്‌സ്റ്റർ സിനിമകളിൽ നിന്ന് രൺവീർ ഇടവേള എടുക്കുകയാണെന്നും മറ്റു ഴോണറുകളിലേക്ക് കൂടുതൽ ശ്രദ്ധ കൊടുക്കാൻ ആണ് നടന്റെ ഉദ്ദേശം എന്നുമാണ് റിപ്പോർട്ടുകൾ. ജയ് മേത്ത സംവിധാനം ചെയ്യാൻ ഒരുങ്ങുന്ന പ്രളയ് ആണ് ഇനി ഷൂട്ടിംഗ് തുടങ്ങാനുള്ള രൺവീർ ചിത്രം.

2006 ലാണ് 'ഡോൺ' ആദ്യ ഭാഗം പുറത്തിറങ്ങുന്നത്. ചിത്രത്തിലെ ഷാരൂഖിന്റെ പ്രകടനവും ഫർഹാൻ അക്തറിന്റെ സംവിധാനവും ഏറെ ശ്രദ്ധ നേടിയിരുന്നു. 2011 ലാണ് 'ഡോൺ 2' പുറത്തിറങ്ങുന്നത്. സമ്മിശ്ര പ്രതികരണം നേടിയ സിനിമ ബോക്സ് ഓഫീസിൽ വിജയമായിരുന്നു. ബൊമൻ ഇറാനി, പ്രിയങ്ക ചോപ്ര, കുണാൽ കപൂർ, ഓം പുരി എന്നിവരാണ് സിനിമയിൽ പ്രധാന വേഷങ്ങളിൽ എത്തിയത്. ആദ്യ രണ്ട് ഭാഗങ്ങളുടെയും തുടർച്ചയല്ലാതെ ഒരു സ്പിരിച്വൽ സീക്വൽ പോലെയാണ് മൂന്നാം ഭാഗം പുറത്തിറങ്ങാൻ ഒരുങ്ങിയത്.

Content Highlights: farhan akthar demands 40 crores from ranveer singh for walking out from don 3 movie